BADMINTON RACKET ORIGINAL LEH FAKE HRIAT HRAN DAN:

Racket hi thil hlu leh man tam tham takte a ni a, duplicate/fake lei palh awm thei a ni. Khawlai a inzuar kual mai mai ta hi chu lei loh a fuh tlangpui. India rama YY YONEX product importer chu 'Sunrise Sports (I) Pvt. Ltd' an ni a, anni hnen atang hian state hrang hrang a Yonex Distributor, authorised dealer/wholesaler- te chuan la chhawngin sub-dealer te, retailer te hnenah an pe chhawng ve leh thin. Yonex bikah chuan original/authenticate a nih leh nih loh hriat hranna hi chi 4/5 vel a awm thei ang:- 

1) Hologram sticker: Yonex hologram sticker bial sawl emaw kil li/ractangular shape) eng tle deuh ver, a grip cone zum lai, a shaft(a ngul) bul deuh chiah a an bel thin hi original product-ah chuan a nghet em em a, kheuh khawh mai har ve tak a ni. Original racket a mi chu him pialin i kheuh khawk thei kher lovang a, a sir zawng a i en chuan YY YONEX tih inziak i hmu thei ang. Fake racket-ah chuan hei hi awlsam taka kheuh khawh mai theih a ni. 

Yonex hi chuan thil charna ban tha bik tak, special glue an hman bik vang a ni.

2) He mi Yonex hologram kan sawi bul chiah grip cone(zuih pat mai) lai ah hian YY YONEX tih logo inziak kan hmu a, a rawng hi chu Racket colour a zirin a var te a dum te pawhin a in ziak thei a, YY YONEX tih inkar tak hi a zim hle a space khat emaw a chanve ang vel emaw chauhin tlem te awl a awm a ni. Heih hi Fake Rackket-ah chuan a inkar hlat deuh zawk a ni awm e(Fake Racket tak hi ka la hmangin ka la belchiang ve chiah lo a), chubakah Y0NEX tih a, 0 letter tak hi kan ziah ang hian artui sawl ang deuh in a sawl tung hle tih hriat tur a ni, hei chi Fake-ah chuan a bial 'O' chiang bik a ni. Hei hi a chhan chu company reng reng hian an logo ziahna hawrawp(font) hman bik an neih thin vangin chu chu fake product siam tute tan pawh a font dik tak kha hriat a har em em thin a, ang tak erawh chu an hmang ve thin a ni.

3) Product number: YONEX hian an product reng reng hi mumal takin product number an neih tir/pe vek a, a shaft bul thutah hian shaft number digit 7 a awm a, a grip ah hian product code number, ram hrang hrang hming lamtawi entir nan JP for Japan, SP for Singapore, MY for Myanmar etc. tihte a awm hrang leh vek a, heng alpha-numeric code number-te hi laser khawl hmanga a ker ngei a ker thlap an ni a, i tin khan han kheuh la, engraved anih dan chu i hre thiam ang a, hei hi duplicate/fake racket-ah chuan a ang thei ang berin a ziah in an ziak thin a, han khawih vel pawhin khuar awm lovin a mam tawp tlangpui.

4) Butt Cap :A fawng lukhum? kan ti mai dawn em ni, a grip hmawr a plastic an vuahah hian YY tih pawr lian tha fu in a inziak kalh mai bawk a, YY YONEX colour bik rawng hring takah a varin a in ziak thin tih kan hria, Japan siam racket man to, high end racket-ah te chuan a hnuaiah JAPAN tih fiah fai takin a in ziak thin bawk a, hemi plastic color hring tak hi duplicate/fake -ah chuan a dal/da bui bik thin a; Japan tih inziak pawh hi a te deuh bik a ni. hei chu a rawng a tang hian genuine product a ni em tih chu thil chik mi tan chuan hriat hran ve mai theih a ni.

5) Sunrise Hologram: Heng kan sawi bakah hian India rama Yonex Racket chawlut tu Sunrise hologram emaw a racket a zirin Barcode serial a racket spec hriat theihna leh Sunrise label te hi a awm ngei thin a importer labelah hian address leh import hun leh MRP leh customer care email leh contact number te a chuang thlap a, hologram chu grip-ah a inbel thin a, a tle var a, han en chiang la sunrise tih leh a chunga logo bial sawl pahnih in cross a awm pangpar ang deuh i hmu ang a, serial number awm lehin kheuh chhuah tur 'scratch here' tih a awm bawk a, chu chu han kheuh la alpha-numeric code number inziak tlar that mai i hmu leh bawk ang a, hemi no hi original product a ni tih tichiang tu atan Yonex website atanga en check leh vek theih a ni. Mahse he sunrise hologram emaw barcode serial emaw hi chu lo tla palh leh bung tawh te pawh product hlui deuh thenkhat ah chuan awm thei a ni a, hemi awm lo pawh nise genuine product chu a chung a kan sawi tak a tang hian a hriatthiam theih tawh tho awm e. He mi Sunrise hologram inbel hi chu product dang a mi entir nan Yonex pheikhawk bawm a mi pawh la thlain Racket gripah an bel ve mai mai thei tho tih hriat tel a tha ang.

LI-NING : China company lar em em, Li-ning product thung hi M/s Indo Rubber & Plastic Works Pvt Ltd, Meerut in India ramah an import ve thin a tunah chuan Sunlight Sports, Bangalore hi Li-ning product importer leh india rama distributor an ni. Li-ning hologram/bar code serial no a awm ve bawk. A import tu hming leh address leh MRP te chiang takin a lang a, (hei hi Yonex ah pawh a ni tho a). Original product ah hi chuan serial no hi a tlangpui in a in ker khuar (engrave) zel a, mahse Yonex angin shaft number leh grip number hi an nei hrang vek hran lo a, racket changkan dan a zir te pawhin a dang a nih hmel. Li-ning logo dik tak chemte hmawr zum pian ang deuh hi a grip hmawr butt cap kan tih ah khan a pawng emaw pawng kher lo pawhin a in ziak ve zel thin. Li-ning product genuine chu an website www.lining.com/fwcx atangin verify theih vek bawk a ni.

Racket chu regular player chuan a tlangpuiin a model/hming atangin a man awm ang tur chu kan hre deuh vek ang a, a man awm ang aia a tlawm hle chuan duplicate a ni thei a, lei dawnah chik leh zual a tha ang. Tin chhan dang, hralh ruk emaw, sum harsatna vanga tlawm chu a awm thei tho e, hei chu thu dang nise..

Engpawhnise, Racket a ni emaw, thil dang pawh nise, thil lei dawn reng reng in chik peih ve a tha ber a, Product duplicate leilo turin fimkhur tur a ni. Tlawm mahse a hlu ngai lo. Madina : abelosenterprise@gmail.com 06/09/2020.(re-edited 8.7.2023)